पूर्वाञ्चल दैनिक २९औं बर्षमा

बिर्तामोड, १ मंसिर । झापाको बिर्तामोडबाट निरन्तर प्रकाशित हुँदै आएको पूर्वाञ्चल दैनिक २९ औं बर्षमा प्रवेश गरेको छ ।

नेपाली पत्रकारिताको इतिहास हेर्दा मोफसलमा पहिलो अफसेट प्रविधि भित्राएर बिर्तामोडबाट प्रकाशित हुँदै आएको पूर्वाञ्चल दैनिकले सफलता पूर्वक २८ औं बर्ष पूरा गरेको छ ।

श्रीअन्तु प्रकाशन प्रालिद्वारा प्रकाशित पूर्वाञ्चल दैनिक ‘क’ श्रेणीमा वर्गीकृत पत्रिका हो । कोशी प्रदेशका विभिन्न जिल्लामा प्रत्यक्ष बिक्री वितरण हुँदै आएको पूर्वाञ्चल अनलाइन पोर्टलमार्फत विश्वभरका पाठक माझ पुग्न सफल भएको छ ।

अनलाइन पोर्टलमार्फत ताजा अपडेट र रंगीन ई–पेपर मोवाइलबाटै पढ्न सकिने भएकाले पाठक, विज्ञापन दाता तथा शुभचिन्तकहरुको रोजाइमा रहेको छ । २९औं बर्ष प्रवेशको क्षणमा पूर्वाञ्चलले आफ्ना समस्त पाठक, विज्ञापनदाता, सञ्चारकर्मी, कर्मचारी मित्रहरु, शुभिचन्तक लगायत सबैमा धन्यवाद ज्ञापन गरेको छ ।

अहिले आम सञ्चारजगतले अनुभूत गरेको र भोगेको अवरोध तथा संकट विद्यमान रहेको र नेपालका सञ्चार माध्यम विगतका बर्षहरुमा महामारीका रुपमा विस्तार भएको कोभिड विपद्पछि राम्ररी चल्न नसकेको पूर्वाञ्चलले उल्लेख गरेको छ ।

‘सञ्चार माध्यमको मुख्य आयस्रोत विज्ञापन हो । कोभिडपछि विज्ञापन बजार खुम्चिएको छ । भएका विज्ञापन पनि ईन्टरनेटका माध्यमतर्फ केन्द्रित छन् । नेपाली छापा माध्यम संकटग्रस्त अवस्थामा गुज्रिरहेको छ’–२९ औं वर्ष प्रवेशको सन्दर्भमा पूर्वाञ्चल दैनिकका प्रधान सम्पादक एकराज गिरीले सरकारको ध्यानाकर्षण गराउँदै भने–‘नेपाली छापा माध्यमको विकास र प्रवद्र्धनमा तीनै तहका सरकारको विशेष ध्यान जान जरुरी छ ।’

संविधानको मूल मर्म र भावना एवम् प्रेस तथा अभिव्यक्ति स्वतन्त्रताप्रति पूर्ण प्रतिबद्ध रही नागरिकको सूचना प्राप्त गर्ने अधिकार सुरक्षित राख्ने अठोट अनुसार अघि बढेको पूर्वाञ्चलले जनाएको छ ।

पत्रकारिताको आदर्श, निष्ठा, आधारभूत सिद्धान्त एवम् पत्रकार आचारसंहिताको मूल मर्म र भावना अनुसार वस्तुनिष्ठ, सत्य–तथ्य, सन्तुलित, खोजमूलक समाचार सामग्री सम्प्रेषण गरी राष्ट्र र समाजलाई सचेत र गतिशील बनाउँदै लैजाने कार्यमा पूर्वाञ्चल प्रतिबद्धत छ ।