धुलाबारी । बिर्तामोडमा मुख्य कार्यालय रहेको शिक्षा बहुउद्देश्यीय सहकारी संस्थाले नवौं वार्षिक साधारण सभाका लागि धुलाबारी सेवा केन्द्रको प्रतिनिधि छनौट कार्यक्रम सम्पन्न गरेको छ । संस्थाको नवौँ वार्षिक साधारण सभा मंसिर २४ गते बिर्तामोडमा हुँदैछ ।
संस्थाका अध्यक्ष सुब्रत न्यौपानेको अध्यक्षता तथा मेचीनगर वडा नं। ९ का वडाध्यक्ष गोपाल खड्काको प्रमुख आतिथ्यतामा भएको कार्यक्रममा अध्यक्ष न्यौपानेले संस्थाको वार्षिक प्रतिवेदन सार्वजनिक गरेका थिए ।
प्रस्तुत प्रतिवेदनमा शिक्षा बहुउद्देश्यीय सहकारीको शेयर सदस्य संख्या ३ हजार ८०८ रहेको उल्लेख छ । कोरोना संक्रमणका बाबजुद पनि गत आर्थिक वर्षमा संस्थामा ११ सय भन्दा बढी नयाँ सदस्य थपिएको उल्लेख छ ।
पाँचवटा सेवा केन्द्र रहेको उक्त संस्थाको शेयर पुँजी २ करोड ६९ लाख ९८ हजार ७०० सय रहेको छ । चालु आर्थिक वर्षमा शतप्रतिशत वृद्धि गरेर शेयर पुँजी ५ करोड ३९ लाख ९७ हजार ४०० सय पुर्याउने लक्ष्य राखिएको छ ।
२ करोड ८३ लाख ९ हजार २६९ रुपैयाँ आम्दानी रहेको सो संस्थाको शेयर लगानी ३३ लाख १८ हजार ७०० रहेको छ । संस्थाले १४ करोड ५० लाख ८३ हजार ६०७ रुपैयाँ बचत संकलन गरेको छ ।
शिक्षा, स्वास्थ्य तथा सामाजिक क्षेत्रलाई प्राथमिकतामा राखेर संस्थाले कार्यक्रमहरु सञ्चालन गर्दै आएको छ । आफ्ना सदस्य हितका लागि सहुलियतमा ऋण लगानी तथा अन्य सहायता प्रदान गरिरहेको प्रतिवेदनमा उल्लेख छ । संस्थाका सचिव दीपेश द्यौरालीले सञ्चालन गरेको कार्यक्रममा स्वागत सञ्चालक समिति सदस्य चिजा राई गरेकी थिइन् ।
प्रतिकृया दिनुहोस्