हत्या आरोपमा किसान पक्राउ

मेचीनगर । मेचीनगर ९ का पर्शुराम गौतमको हत्यामा संलग्न रहेको आशंकामा प्रहरीले दुई जनालाई पक्राउ गरेको छ ।
प्रहरीका अनुसार मेचीनगर नगरपालिका ९ का ४७ वर्षीय बुधलाल किसान र सोही ठाउँका २८ वर्षीय भयंकर किसान पक्राउ परेका हुन् ।
झापा मेचीनगर ९ खुट्टीडाँगी मगरटोलका ४२ वर्षीय गौतम पुष ३ गते विहान आफ्नै घरको आगनमा मृत फेला परेका थिए ।
घट्ना लगत्तै इलाका प्रहरी कार्यालय काँकरभिट्टा र धुलावारीले हत्या घटनाको संयुक्तरुपमा अनुसन्धान गरिरहेको थियो । इलाका प्रहरी कार्यालय काँकरभिट्टाका प्रहरी नायब उपरीक्षक राजेन्द्र पोखरेल नेतृत्वको प्रहरी टोलीले बुधलाललाई उनकै घरबाट र भयंकरलाई नेपाल भारतको सीमाक्षेत्रबाट पक्राउ गरेको प्रहरीले बताएको छ ।
प्रक्राउ परेका दुवै जनाले प्रारम्भिक बयानका क्रममा हत्यामा आफूहरुको संलग्नता रहेको स्वीकारेको प्रहरी स्रोतले जानकारी दिएको छ ।
उनीहरू तीनजनाले पुस २ गते रातिसँगै मादक पदार्थ सेवन गरेको र सामान्य विवाद हुदाँ घटना हु्न गएको बयान दिएको प्रहरी श्रोतले बताएको छ । मृतक गौतमको टाउकोमा गहिरो चोट थियो ।