झापामा २७ जना कोरोना संक्रमित थपिए संक्रमितको संख्या १०७ पुग्यो

झापा,१६जेठ ।पछिल्लो समय झापा जिल्लामा तीव्र रुपमा कोरोना संक्रमित थपिदै गएका छन्। शुक्रबार झापाको कचनकवलका थप २७ जनामा कोरोना भाइरस पुष्टि भएको छ । यो सँगै झापामा संक्रमितको संख्या १०७ पुगेको छ । कचनकवलमा मात्रै संक्रमितको संख्या १ सय पुगेको छ ।
कोसी कोभिड अस्पताल विराटनगरको प्रयोगशालामा गरिएको पिसिआर परीक्षणमा झापामा थप २७ जनामा कोरोना संक्रमित पुष्टि भएको झापाका सहायक प्रमुख जिल्ला अधिकारी राजकुमार राईले बताए । कचनकवलमा हिजो दिउँसो मात्रै २५ जनामा कोरोना पोजेटिभ देखिएको थियो । गाउँपालिकाले १६२ जनाको स्वाब परीक्षणका लागि पठाइएको थियो ।
कचनकवलका छवटा क्वारेन्टिनमा बसेका सबै भारतको संक्रमित क्षेत्र मुम्बई, दिल्ली, गुजरात, तामिलनाडुबाट आएका हुन् । गाउँपालिकाकामा अहिलेसम्म भारतबाट ४ सयभन्दा बढी नेपाली आइसकेका छन् । कचनकवलमा बुधबार मात्रै जानकी आमावि क्वारेन्टिनका १५ जना थपिएका थिए ।
झापामा यसअघि बाह्रदशी गाउँपालिका र गौरदाह नगरपालिकामा दुईदुईजना र झापा गाउँपालिका, दमक र भद्रपुर नगरपालिकामा एकएकजना संक्रमित भेटिएका थिए । बाह्रदशी र दमकका संक्रमित निका भएर घर फर्किसकेका छन् ।