मेचीनगर, ११असार । मेचीनगरमा हात्तीको दीर्घकालिन समस्याको समाधान तथा मेचीनदीबाट हुने कटान नियन्त्रणको लागि व्यवस्थित तडबन्धन गर्नु पर्ने बाहुण्डाँगी वासीले आग्रह गरेका छन् ।
हात्तीले पुर्यााएको क्षतिका बारेमा बुझ्न बाहुण्डाँगी पुगेका सांसदहरु, सिडिओ, मेयर, उपमेयर, वडाध्यक्ष, एसपी लगायतको टोली लाई स्थानीयले सो आग्रह गरेका हुन् ।
प्रतिनिधि सभा सदस्य राम कार्की, प्रदेश सभा सदस्यहरु श्रीप्रसाद मैनाली, राधा थापा, सिडिओ छविराज रिजाल, मेचीनगर नगरपालिकाका प्रमुख गोपाल चन्द्र बुढाथोकी, निवर्तमान नगर प्रमुख विमल आचार्य, उपप्रमुख मीना पोखरेल उप्रेती, वडाध्यक्ष अर्जुनकुमार कार्की, जिल्ला प्रहरी कार्यालय झापाका प्रमुख एसपी विश्वमणि पोखरेल, सशस्त्र प्रहरी २ नम्बर गण झापाका प्रवक्ता डिएसपी प्रेम भण्डारी लगायतको टोलीले भारतबाट हात्ती छिर्ने मुख्य सीमा नाका मेचीनगर–४ स्थित भन्सार गौडाको मलामी टोलमा निरीक्षण गरेको थियो ।
‘मेचीनगरका जनता वर्षौदेखि हात्तीबाट पीडित छन्’, नगरप्रमुख बुढाथोकीले भने–‘उनीहरुको दीर्घकालिन समस्या समाधानका लागि स्थानीय, प्रदेश र संघीय सरकार लाग्ने छ ।’
विगतमा हात्ती छेक्न लगाएको सोलार फेन्सिङ विद्युतीय तारबार भत्कीएको छ । काम नै नलाग्ने अवस्थामा पुगेपछि दिनहुँ हात्तीहरु हुलका हुल छिरिरहेका छन् । स्थानीयको धानबालीमा क्षति पुगेको छ भने घर भत्काउने, मानिसलाई घाइते बनाउने र मार्ने सम्मको हर्कत हात्तीले गरिरहेको छ । यसमा तीन वटै सरकारले ध्यान दिएको अवस्था छैन । हात्तीबाट धानबालीकोे क्षति हुँदा सरकारले सामान्य राहत बाहेक अरु केहि दिएको छैन ।
निवर्तमान नगरप्रमुख आचार्यको पालामा भन्सार गौडामा हात्ती छेक्न केहि ठाँउमा तटबन्धन गरिएको थियो । र पनि त्यसको दायाँ बायाँबाट हात्तीहरु छिरिरहेका छन् ।
‘हात्ती छेक्न तत्काल विद्युतिय तारबारलाई मर्मत गर्नुको विकल्प छैन’, प्रमुख बुढाथोकीले भने–‘यसका लागि कार्यपालिकाको वोर्ड वैठकले निर्णय गरिसकेका छ । अब सीमा क्षेत्रमा चाँडै विद्युतीय तारबार मर्मत गरिने छ ।’
उनले मेचीनगर–६ को बर्मेली टोलदेखि इलाम सलकपुर छेउ तिरिङ सम्मको करिव २५ किलोमिटर नेपाल पटिको क्षेत्रमा तटबन्धन ९बाँध० निर्माण गर्न जरुरी रहेको बताए । त्यसका लागि करिव १ अर्व बजेट आवश्यक पर्ने उनको बुझाई छ । तटबन्धन गर्न सके भारतबाट हात्ती पनि नआउने, नदी नियन्त्रण र सिद्दीखोलाको नहरलाई त्यहाँ जोड्न सकिने बुढाथोकीको भनाई छ ।
मेचीनगर–४ का वडाध्यक्ष कार्कीले शनिबार साँझ समय अभावका कारण भन्सार गौडामा मात्र सांसदको टोलीलाई भारतबाट हात्ती आउने ठाँउ र यहाँका समस्याका बारेमा जानकारी गराएका थिए । वडाध्यक्ष कार्कीले स्थानीय २० जनालाई हात्ती धपाउन टर्चलाईट पनि वितरण गरेका थिए ।
त्यस्तै मानव हात्ती द्वन्द व्यवस्थापन तथा वातावरण संरक्षण मञ्चका अध्यक्ष हरिप्रसाद उप्रेती, स्थानीय शंकर लुईटेल लगायतले पनि हात्तीबाट भएको मानवीय तथा धान बालीको क्षति, समस्या र समाधानका विषयमा टोलीलाई अवगत गराएका थिए ।
प्रतिकृया दिनुहोस्