मेचीनगर, १ चैत । स्ववियु निर्वाचनको विषयलाई लिएर काँकरभिट्टा बहुमुखी क्याम्पसमा विवाद उत्कर्षमा पुगेको छ । निर्वाचनकै विषयमा आज दुई संगठन बीच झडप भएको छ भने नेकपा एमाले निकट विद्यार्थी संगठन अनेरास्ववियूले क्यम्पसको मुलगेटमा आगजनी समेत गरेका छन् ।
बुधवार विहान निर्वाचन समितिले बिना सूचना उम्मेदवारहरुको मनोनयन दर्ताको प्रक्रिया थालेको भन्दै अनेरास्ववियुको समूहले मनोनयन पत्र र क्याम्पसको बोर्ड जलाएको तथा क्याम्पसको मुल गेट अगाडि टायर बालेर विरोध प्रदर्शन गरेका थिए।
सोहि क्रममा अनेरास्ववियु क्याम्पस कमिटि अध्यक्ष सन्देश पौडेल र अनेरास्ववियुका जिल्ला कार्यालय सचिव सन्तोष धमलालाई प्रहरीले पक्राउ गरेको थियो । उनीहरुलाई साँझ छाडिएको इलाका प्रहरीका कार्यालय काँकरभिट्टाका प्रमुख डीएसपी दीपक भारतीले बताए ।
यही चैत ७ गते हुने चुनावका लागि नेविसंघ, एकीकृत समाजवादी र राप्रपा निकटका विद्यार्थीहरु तथा अनेरास्ववियुका विद्यार्थीहरुबीच केहि दिनदेखि विवाद बढेको थियो ।
यही फागुन १९ गते मतदान गर्न पाउने विद्यार्थीहरुको नामावली प्रकाशन गरिएको थियो । जस अन्तरगत नयाँ थपिएका ६२ जनासहति ६१६ जना विद्यार्थीले मतदान गर्न पाउने निर्वाचन समितिका संयोजक हेमकुमार खड्काले बताए । तर अनेरास्ववियुका विद्यार्थीहरुले अन्तिम समयमा आएर क्याम्पस प्रशासनले नयाँ विद्यार्थीहरुलाई भर्ना गरेको विषयमा आपत्ति जनाएका थिए ।
संयोजक खड्काले विधि र प्रक्रिया अनुसार नै नयाँ विद्यार्थीहरु भर्ना भएको दावी गरे । ‘फागुन २७ गते नै उम्मेदवारको मनोनयन दर्ता गर्ने समय थियो’, संयोजक खड्काले भने–‘अनेरास्ववियुका विद्यार्थीहरुले आपत्ति जनाएपछि आजलाई सूचना टास गरेर मनोनयन दर्ताको समय राखेका थियौँ । प्रक्रिया अनुसार मनोनउन दर्ता भइसकेको छ ।’
अनेरास्ववियुका विद्यार्थीले केहि दिनदेखि क्याम्पस प्रशासनको कार्यकक्षमा ताला गलाएका छन् भने आज क्याम्पसको मुल गेटमै ताला लगाइदिएका छन् ।
हाम्रा मागहरु सम्बोधन नगरी बिना सूचना मनोनयन दर्ता पक्रिया सुरु गरेकोले क्याम्पसमा ताला लगाएर विरोध प्रदर्शनमा उत्रनु परेको अनेरास्ववियुका विद्यार्थी नेताहरुले बताएका छन् ।
घट्ना पछि दिउँसो इलाका प्रहरी कार्यालयमा सर्वदलीय छलफल भएको थियो । छलफलमा झापाका सीडीओ शिवराम पोखरेल, मेचीनगर नगरपालिकाका मेयर गोपाल चन्द्र बुढाथोकी, उपमेयर मीना पोखरेल उप्रेती, संविधान सभा सदस्य रविन कोइराला, निवर्तमान मेयर विमल आचार्य, निर्वाचन संयोजक खड्का लगायतको सहभागिता रहेको भएपनि विवाद समाधान हुन सकेन । बार्ता भोलि फेरि बस्ने भएको छ ।
क्याम्पसमा अहिले पढाई ठप्प छ । स्ववियु निर्वाचनको विवाद उत्कर्षमा पुगेको छ । फागुन १५ गतेदेखि क्याम्पसमा पढाई भएको छैन । चुनाव हुन्छ कि हुँदैन भनेर विद्यार्थीहरु अन्यौलमा रहेका छन् ।
प्रतिकृया दिनुहोस्